Жаңа ВАЗ моторының ресурсы белгілі болды

Өткен айда АВТОВАЗ Lada-ның 1.6 және 1.8 литрлік жаңарған атмосфералы моторын таныстырды. Көп жылғы пайдалану тәжірибесіне сүйеніп, инженерлер жаңарған моторларды ондаған жаңа бөлшекпен жабдықтады, соның арқасында қуаты артып, сенімді бола түсті.

Жаңа буындағы Lada моторының, соның ішінде «Ниваның» 90 ат күшін беретін қозғалтқышының ең төменгі ресурсы 220 000 километр. Мұны «Автоновости дня» басылымына АВТОВАЗ-дың агрегаттарды жобалау бөлімінің басшысы Григорий Лычев айтқан.

Маман аталған межеге жету үшін техникалық қызмет көрсету регламентін сақтау қажет екенін ескертті. Ресурсқа автомобильді пайдалану ерекшелігі, қозғалтқыштың жұмыс режимі және жағармай материалдарының сапасы да әсер етеді.

Жүргізуші күтіп пайдаланса, мотор қағаз жүзіндегі көрсеткіштен әлдеқайда көп жүруі мүмкін. Нақты қанша? «Іс жүзінде 400 мың, тіпті 450 мың км жүргендерін кездестірдік», — деді Лычев.

Бұл агрегаттар әлі ұзақ жыл қолданыста болады, өйткені марка оларды екі жаңа моделіне орнатады. Атап айтқанда, 120 ат күшіне ие шағын мотор — «Искраға», 135 ат күшін беретін үлкендеуі «Азимутқа» арналған.