АВТОВАЗ-дың кейінгі жылдардағы басты жаңа өнімі — Iskra ақыры Қазақстанда саудаға шықты. Қазір автомобильдің атауында SW қосымшасы бар универсал нұсқасы ғана сатылады. Enjoy комплектациясы 8.7 млн теңге тұрады. Бұл сомаға биыл мамырдан бастап Ресейде жасалған көліктерге салынуға тиіс жоғары утиль алымы кірмейтіні анық. Сондықтан автосалондар бұйрық күшіне енбей тұрып елге келген машиналарды сатып жатқан болуы мүмкін.
Lada Iskra SW моделінің ұзындығы — 4.33 метр, дөңгелек базасы — 2.6 метр, клиренсі — 170 мм. Бес есікті түрленімнің жүксалғыш көлемі — 480 литр, ал креслоны бүктегенде 1965 литрге жетеді. Машина 90 ат күшіне ие 1.6 литрлік 8 клапанды мотормен жүреді, қозғалтқыш 5 сатылы механика қораппен жұмыс істейді.
Жабдықтар тізіміне алдыңғы қауіпсіздік жастығы, базалық көмекшілер кешені, жаңбыр және жарық сезгегі, круиз-бақылау, алдыңғы креслоны жылытқыш, кондиционер, 8 дюймдік экраны мен төрт динамигі бар EnjoY Evo медиажүйесі кіреді. Универсалдың орындықтары екі түсті матамен қапталған, қолмен реттеледі. Рөлді де реттеуге болады. Iskra 185/65 өлшемді шинасы бар 15 дюймдік болат дискімен жабдықталған.
Комментариев: 0