SsangYong брендінің ізбасары KG Mobility Қытайдың Chery компаниясымен стратегиялық серіктес атанды. Олар жаңа технологияны бірлесіп әзірлейді әрі корейлер Chery платформасының біріне лицензия алады.
KGM Chery-мен серіктестік автомобиль жасау уақытын қысқартып, модельдік топтаманы кеңейтуге әрі тез өзгеріп жатқан нарық талабына бейімделуге мүмкіндік береді деп сеніп отыр. Жаңа платформаға негізделген SUV компания дамуына жаңа жол ашады. KGM Chery-мен бірге ішкі және әлемдік нарыққа арналған орта және толық өлшемді кроссовер шығаруды жоспарлап отыр.
Ал Chery KGM-мен серіктес болу арқылы кедендік шектеулер мен әртүрлі санкцияны айналып өтуді көздейді. Мысалы, бірлесіп шығарған автомобиль заңды түрде Корея өнімі саналады әрі импорт салығы жоғары болмайды.
Chery жақында Jaguar Land Rover компаниясымен де осындай келісімге келді. Үндістандық Tata концернінің құрамына кіретін Британия компаниясы қытайлық серіктесінің платформасын пайдаланып, Freelander кроссоверін шығаруды жоспарлап отыр. Ол Exeed маркасының кей моделіне немесе Exlantix топтамасындағы электрокарларға қолданылып жүрген архитектура болуы мүмкін.
Оңтүстік Кореяда KGM мен Chery-ден бөлек тағы бір бірлескен кәсіпорын жұмыс істеп тұр. Жазда жергілікті Renault өкілдігі өңі өзгерген Geely Monjaro болатын Grand Koleos кроссоверін көрсетті.
Комментариев: 0