Жаңа «Нива» 2024 жылы шығады

Жаңа жыл қарсаңында жарияланған релизде автозауыт жуырда атауын өзгерткен «Ниваның» үшінші буыны 2024 жылдың аяғында жарық көретінін хабарлады.

Жаңа Niva Renault мамандары әзірлеген CMF-B платформасына негізделеді. Үш есікті көлік өндірістен алынып, нарыққа ұзындығы 4.28 метр, ось арасындағы қашықтық 2.6 метр болатын бес есікті стандарт модель жол тартады. 2026 жылы қатарға Grand Niva қосылады.

Жаңа буын өкілі аңызға айналған модельге тән концепцияны сақтап қалады. Клиренсі биік жол талғамайтын машина толық жетек жүйесімен жабдықталады. Өндіруші модельді жолдары сапалы, экологияға қатысты талабы қатаң Еуропа нарығына қайта шығаруды көздеп отыр, сондықтан көліктің жолсызда еркін жүру мүмкіндігінен гөрі табиғатқа зиянын азайтуға көп мән беріледі. Қарапайым бес есікті нұсқа 12-16 мың еуро аралығында сатылса, стретч 20 мыңнан саудаланады.

Жаңа «Нивадан» бұрын АВТОВАЗ 2023 жылы В сегментіндегі екі жеңіл модель ұсынады, ал 2025  жылы С сегментіне тиесілі кроссоверді таныстырады.