1998 жылы Lexus RX премиум кроссоверлер сегментінің алғашқы өкілдерінің бірі болып еді, 24 жыл өткен соң модель кезекті рет буын алмастырды.
Бесінші Lexus RX GA-K платформасына негізделген. Ол шанақ қаттылығын арттырып, көлікке көп иінтіректі артқы аспа мен толық басқарылатын шасси берді. Модельдің артқы дөңгелектері жылдамдыққа байланысты алдыңғысымен бірге не оған қарама-қарсы 4 градусқа бұрыла алады. Ұзындығы бұрынғыдай (4890 мм), ал дөңгелек базасы 60 мм-ге ұлғайды. Ені — 1920 мм.
Дизайнерлер радиатор торын біршама өзгертіп, жоғарғы бөлігін пластикпен жапқан. Жарықдиодты жолақпен біріккен артқы шамдар да көз тартады.
Салонда мультимедиа кешенінің 14 дюймдік экраны ерекше көрінеді. Бұл экран опция ретінде ұсынылады. Қарапайым жабдықталған машинаға 9.8 дюймдік экран қояды екен. Аспаптар панелі цифрлы, көлемі шағын. Айтпақшы, әдеттегі есік тұтқасының орнына батырма орнатыпты. Мұндай ерекшелікті NX-тен де байқауға болады.
Электронды көмекшілер тізімінде жаңарған Lexus Safety System+ 3.0 кешені бар. Ол бейімді круиз-бақылау, жаяу жүргінші мен мотоциклшіні анықтау функциясына ие автоматты тежеу, жолақ пен қатарды қадағалау сияқты жүйелерден тұрады. Сонымен қатар машина автотұрақшымен жабдықталуы мүмкін.
Жаңа RX капотының астында атмосфералы V6 болмайды. Оның орнын 2.4 литрлік турбомотор басады. RX 350-дегі 239 ат күшіне (429 Нм) ие агрегат 8 сатылы автоматпен және алдыңғы не толық жетек жүйесімен жұмыс істейді. Гибрид нұсқа 2.5 литрлік атмосфералы қозғалтқышпен және шағын электромотормен жүреді. Екеуі бірлесіп 249 ат күші мен 316 Нм момент береді.
Топтамадағы үздігі — Lexus RX 500h. Оның күштік құрылымы 2.4 турбомотордан, 6 сатылы автомат қорап және артқы осьтегі электромотордан тұрады. Жалпы 367 ат күшін (550 Нм) береді. Мұндай RX алғашқы жүздікті 5.9 секундта алады.
Модельге қатысты толық мәлімет жыл аяғына қарай, яғни сатылым басталғанда белгілі болады.
Комментариев: 0