Жаңа Lexus LX-тің моторынан ақау табылды

Жаз басында Toyota концерні АҚШ-та 3.4 литрлік үрлемді V6 мотормен жүретін он мыңдаған рамалы жол талғамайтын көліктен ақау табылғанын хабарлады. Мамандар қозғалтқыш қызметіне теріс әсер ететін күрделі проблема тапқан. Ол кезде Toyota ақауды жөндеуге тырысып жатқанын мәлімдеді, бірақ қазір моторды ауыстыру мәселені шешудің ең оңай жолы екені анықталыпты.

Проблеманың себебі — құрастыру кезінде қозғалтқышқа түскен технологиялық қалдық. Шеберлер кейбір детальді орнату алдында жақсылап тазартпаған, салдарынан көптеген сериялы автомобильге шаң мен кір қонған қозғалтқыш орнатылған. Бұл кемшілік мотор жұмысына кері әсер етіп, қуатын жоғалтады, бұл апатқа немесе агрегаттың істен шығуына себеп болуы мүмкін.

Toyota 2021 жылы шілде мен қараша аралығында АҚШ-та шыққан 3524 дана Lexus LX 600-дің моторында осындай ақау бар болуы мүмкін екенін хабарлады. Сондай-ақ 98 568 Toyota Tundra пикапының қозғалтқышын ауыстыруға тура келеді. Сервистік кампания 2021 жылғы қарашадан 2023 жылғы ақпанға дейін шыққан пикаптарды қамтиды. Концерн V6-ны тегін ауыстырумен қатар, тиісті өтемақы беруді жоспарлап отыр.

Жыл басында Lexus LX АҚШ-та тағы бір сервистік кампанияға себеп болған. Осы модель және Toyota Tundra мен Sequoia-ның (жалпы 280 мың автомобиль) беріліс қорабынан ақау табылған: автомат қорап селекторы бейтарап режиімге қойылса да машина жүріп кетуі мүмкін. Осы себеппен марка Ресейдегі машиналарды да сервиске шықырған.