Lexus жаңарған ES седанын жұрт назарына ұсынады. Ол брендтің тизерлік кампаниясы арқылы емес, Қытайдағы әлеуметтік желіде тараған суреттер арқылы белгілі болды.
Суреттерден ES-тің сырт келбеті аса өзгермегенін көруге болады. Дизайнерлер бумеранг тәрізді шам, Lexus RX стиліндегі радиатор торы, бамперлер мен артқы бөлігін бойлай орналасқан тұтас жарықдиодты жолақ жасады.
Салондағы басты өзгеріс — 14 дюймдік дисплейі бар медиажүйе. Ол енді RX пен GX-тегідей температура мен дыбысты реттейтін екі үлкен шайбамен жабдықталған. Lexus алдыңғы панельдегі физикалық батырмалардан бас тартты, тек әйнек пен айна қыздырғыш батырмалары қалуы мүмкін. Дисплейде бұрынғыдай аналогты сағат бар.
Lexus ES топтамасындағы техникалық жақсарту туралы ақпарат әзірге жоқ, бірақ бұл седан Toyota Camry сияқты 3.5 литрлік V6-дан бас тартуы мүмкін. Суреттегі автокөлік ES 300h индексін алды. Рестайлингке дейінгі нұсқа жалпы қуаты шамамен 215 ат күшін құрайтын 2.5 литрлік атмосфералы қозғалтқышпен және электрлі мотормен жүрген.
Жаңарған Lexus ES Қазақстанға да келуі мүмкін. Қазір бұл модель елде 2.5 және 3.5 литрлік бензинді агрегатпен 28.75-41.86 млн теңгеге сатылады.
Комментариев: 0