Countach 1974-1990 жылдары шығарылған, ол кезде жарысқа арналған 380 ат күшіне ие V12 орнатылған екі мыңнан аса көлік құрастырылды. Қазіргі Countach LPI 800-4 заманауи Aventador мен Sian-ның бір түрі, оның шассиі де, гибрид күштік құрылымы да дәл солардікіндей.
Жеті сатылы ISR қорабының ішіндегі шағын электромотор тек көмекші қызметін атқаратындықтан, энергияның бәрі 48 вольттық желі арқылы жұмыс істейтін суперконденсаторда сақталады. 6.5 литрлік атмосфералы V12 электрлі үстемемен бірге 814 ат күшін береді, нәтижесінде машина алғашқы жүздікті 2.8 секундта алады, тағы 5.8 секундтан соң көліктің жылдамдығы 200 шақырымға жетеді. Ал максимал жылдамдығы — сағатына 355 шақырым. Көліктің алдына 20 дюймдік, артқы бөлігіне 21 дюймдік дискілер орнатылған.
Сырттай Countach LPI 800-4 авторлар шабыт алған ескі модельге ұқсайды. Шанағы мен ауа тартқыштарының пішіні, геометриялық алты бұрышты дөңгелек аркалары және газ шығаратын түтіктері аңызға айналған спорткарды еске салады. Бірақ шамдары шанаққа беттестіріп жасалды, себебі жылжымалы блок қазіргі қауіпсіздік талаптарына сай келмейді. Ал табиғи былғарымен қапталған салоны модельдің ретрокөлік еместігін көрсетеді.
Lamborghini Countach LPI 800-4-тің небәрі 112 данасы жарық көреді. Бағасы әзірше белгісіз, дегенмен бірнеше миллион еуродан төмен болмайтыны анық.
Комментариев: 0