Жаңа Lada толық жетекті болмайды

АВТОВАЗ-дың корпоративтік «Поладим с Lada» телеграм-каналы оқырмандардың көп қойылатын сұрақтарына жауап берді, арасында компания Vesta мен Granta-ның толық жетекті нұсқасын жасауды қарастырып жатыр ма деген де болды.

Тольяттидегі автозауыттың жауабы теріс болды. Компания шетелдік автоөндірушілердің тәжірибесіне сілтеме жасап, жеңіл көлік топтамасына толық жетек жүйесін енгізу жоспарда жоқ екенін және болашақта онымен айналыспайтынын мәлімдеді. Өйткені «Гранта» мен «Веста» B-класының бюджеттік сегментіне кіреді, ал мұндай модификацияларға деген сұраныс өндіруге кететін шығындарды ақтамайды. Мұны нарықта үнемі жүргізілетін зерттеу нәтижелері де растап отыр.

Былтыр «Веста» моделінің жетекші әзірлеушісі Олег Груненков Quto.ru сайтына берген сұхбатында Vesta платформасында толық жетек жүйесі неге қарастырылмағанын егжей-тегжейлі түсіндірген болатын. Шанақтың еден конфигурациясы, агрегаттардың орналасуы және артқы жартылай тәуелді аспа толық жетек жасауға мүмкіндік бермейді.

Оқырмандардан келген басқа сұрақтардың ішінде карбюраторлы қозғалтқыш, қалың металлы бар шанақ және артқы жетекті «классиканың» қайта оралу мүмкіндігі бар. Белгілі себептерге байланысты бренд барлық сұраққа «жоқ» деп жауап берді.