Жаңа коммерциялық машиналар техбайқаудан өтпеуі мүмкін

Көлік министрлігі техникалық тексеріс өткізу ережесіне өзгеріс енгізу жобасын дайындады. Құжатта жүк көлігі, тіркеме, мопед және мотоцикл шыққанына бір жылдан асқан соң ғана 12 ай сайын техникалық тексерістен өтуі міндетті екені жазылған.

Сондай-ақ кәсіпкерлікке арналған жаңа (шыққанына бір жыл болмаған) жеңіл автомобильді, адам таситын автобус пен жүк көлігін және қауіпті жүк таситын машинаны техникалық тексерістен босату жоспарланып отыр. Қазіргі ереже бойынша жаңа машина алғашқы тіркеу кезінде тексерістен өтеді.

Бұл ереже ойға қонымды, жаңа автомобильді тексерудің қажеті қанша? Теориялық тұрғыдан алғанда техника алғаш зауыттан шыққанда мінсіз болады. Ал бір жыл жүрген соң тексерістен өткізу керек.

Қазір автотасымал саласындағы кәсіпте қызмет етпейтін, шыққанына 7 жылдан асқан М1 категориясындағы көлік құралы (жеңіл автомобиль), N1-3 (жүк көлігі), О1-4 (тіркеме), L1-7 (мототехника), сондай-ақ қауіпті жүк тасуға арналған техниканы қоспағанда, арнайы мақсаттағы көлік құралдары 12 ай сайын техникалық тексерістен өтуге міндетті.

Ал автотасымал саласындағы кәсіпте қызмет ететін М1 категориясындағы автомобиль, адам тасуға арналған М2, М3 (автобус) және N категориясындағы автомобиль, сондай-ақ М1, N1-3 және О1-4 санатындағы техникалар 6 ай сайын техникалық байқаудан өтеді.