Жаңарған Kia Rio-ның алғашқы суреттері тамыздың ортасында жарияланған. Көлікке жаңа бампер, өзге шамдар мен 16 дюймдік дөңгелек орнатылғанын көргенбіз. Екі ай өткен соң седан біздің елге жетті. Өскеменде құрастырылатын машина 15 қазан күні ресми сатыла бастайды.
Біздің нарықтағы Kia Rio тек 123 ат күшіне ие 1.6 литрлік мотормен ұсынылады. Ол 6 сатылы автоматпен жұптасады.
Сатып алушылар алты жиынтық арасынан таңдау жасай алады. Ең қолжетімді Classic Audio нұсқасы болат дөңгелекпен, алдыңғы орындықтарды жылытқышпен, екі қауіпсіздік жастығымен, электронды көмекшілер жинағымен, салқындатқышпен, төрт динамигі бар аудиожүйемен жабдықталады, ал салоны матамен қапталады. Бағасы — 6.4 млн теңге.
Ең қымбат нұсқасы — Premium. Бұл Rio-да жылытқыштардың толық жинағы, бүйірлік жастықтар, кілтсіз ашу жүйесі, 4.2 дюймдік дисплей, Apple Car Play-мен, Android Auto-мен жұмыс істейтін мультимедиа кешені және жылдамдықты шектей алатын круиз-бақылау жүйесі бар. Бағасы — 8.2 млн теңге.
Қазақстанда аталған темір тұлпар Hyundai Accent және Volkswagen Polo-мен бәсекелеседі.
Комментариев: 0