Жаңа Kia K4 қандай болады?

Нью-Йорк автосалонында Kia K4-тің техникалық сипаттамасы мен комплектациясы белгілі болады. Ал дизайнын өндіруші бұған дейін жариялап қойған.

Жаңа K4 сырттай седан-фастбэкке ұқсайды. Басты оптикаға жалғасқан күндізгі жүріс шамының дизайны сәл ескі көрінеді. Дегенмен машина экстерьері оң бағаға лайық, Kia шағын модельді үлкен әрі бағалы K5-ке ұқсатып жасаған.

Интерьері де жақсы жабдықталған. Цифрлы аспаптар панелі мен мультимедиа тачскрині бірге орналасыпты, проекциялық экранды опция ретінде алуға болады. Сондай-ақ салондағы танымал функцияларға арналған физикалық батырмалар өзгеріссіз қалды, тіпті беріліс қорабының селекторы дәстүрлі иінтірек түрінде жасалған. Алдыңғы креслоларды жылытуға және желдетуге болады, артқы қатарда мұндай мүмкіндік жоқ, бірақ кең.

Кейбір нарықта K3 деп аталған Cerato седаны Kia топтамасынан шығатын сияқты. K4 біздің ел үшін бейтаныс өнім, өйткені ол 2014-2020 жылдары негізінен Қытайда сатылды, содан бері ізбасары шыққан жоқ. Енді K4 әлемдік нарыққа аяқ басады.

Солтүстік Америкада Kia K4 биыл саудаға түседі, ал Қазақстанға 2025 жылы келеді. Бағасы біздің елде 11.79 млн теңге тұратын Cerato-мен шамалас болуы мүмкін.