Hyundai Creta-ның екінші буыны екі жыл бұрын Қытайда таныстырылды. Ал ЕЭО елдеріне арналған нұсқасы тек биыл жазда жарық көрді. Сол кезде Санкт-Петербургте шығарылған модель жұрт назарына ұсынылған. Күз келісімен шағын кроссовер біздің елге де жетті. Автокөлік Алматыдағы зауытта құрастырылады.
Екінші буындағы машина сырттай қатты өзгерген және оның жаңа кескіні көп адамға ұнай қоймады. Салонға 10.25 дюймдік медиакешен экраны орнатылады. Бірақ оны тек ең қымбат нұсқасынан көре аласыз. Ал техникасында еш өзгеріс жоқ. Модель аспа схемасы мен мотор гаммасын толық сақтап қалды.
Creta 1.6 және 2 литрлік бензинді моторлар арқылы қозғалады. Көліктің алдыңғы не толық жетекті нұсқасын таңдауға болады. Көлемі аз агрегат механикамен де, 6 сатылы автоматпен де жұптасады, ал екіншісі тек автомат қораппен ұсынылады.
Қазақстанда Hyundai Creta төрт жиынтықта сатылады. 1.6 литрлік моторы механикамен жұптаса жұмыс істейтін ең қарапайым кроссовер 9.1 млн теңге тұрады. Алдыңғы жетекті көлік екі қауіпсіздік жастығымен, базалық көмекшілер жинағымен (ESP, HAC, DBC, ABS), салқындатқыш, айна мен орындық жылытқыш және 8 дюймдік экраны бар мультимедиа кешенімен жабдықталады, салоны матамен қапталған. Осылай жабдықталған, бірақ толық жетекті машина алам десеңіз, қосымша 400 мың теңге төлейсіз.
Анықтама ретінде: бірінші буындағы Hyundai Creta-ның бағасы Қазақстанда 7.5 млн теңгеден басталып, опциялар сомасын қоспағанда, 9.4 млн теңгеге дейін барады.
Автомат қораппен жұптасатын 2.0 литрлік мотор орнатылған толық жетекті модель 11.5 млн теңге тұрады. Prime деп аталатын бұл нұсқада бүйірлік жастықтар мен пердеше қолжетімді. Жабдықтар тізімінде алдыңғы парктроник, жарық пен жауын сезгектері, электр жетекті жүргізуші орындығы, аспаптар панелінің ішіндегі 7 дюймдік экран мен жарықдиодты шам бар.
Ең қымбат High-Tech нұсқасының құны — 13.1 млн теңге, әрі бұл екі түсті шанақ бояуы, салонның жасанды былғарымен әрленуі сияқты опцияларды қоспағанда. Машинаға айнала шолу камерасы, көрінбейтін аймақтарды бақылау жүйесі, орындық, рөл және алдыңғы әйнек жылытқыш, 10.25 дюймдік экраны мен 8 динамигі бар Bose мультимедиа кешені орнатылған.
Анағұрлым қарапайым Creta үшін түрлі опциялар қолжетімді екенін айта кеткен жөн. Олардың бағасы 100-700 мың теңге аралығында.
Жаңа Hyundai Creta 1 қыркүйек күні 20:00-де Hyundai Auto Kazakhstan-ның YouTube арнасында ресми таныстырылады.
Комментариев: 0