Жаңа Haval H9-дың сипаттамасы белгілі болды

Haval маркасы Қытай Индустрия министрлігінен екінші буындағы H9-ға сертификат алды. Haval H9 екі түрлі күштік құрылыммен (электрлі емес) жабдықталады әрі сырт пішіні бірнеше түрлі болады. Қытайда машина 215 мың юань (13.5 млн теңге) тұрады.

Haval H9-дың сырт пішіні толық өзгерді. Жол талғамайтын көліктің дөңгелек оптикасы, ірі бампері, өзгеше дөңгелек доғасы, тік бұрышты радиатор торы және төрбұрыш шанағы Raptor моделін еске салады.

Клиент хромды және күңгіріт дизайнның бірін таңдай алады. Сондай-ақ артқы тірек формасының бірнеше нұсқасы бар, 17–19 дюймді дөңгелек дискісінің де бірнеше түрі қолжетімді.

Haval H9-дың дөңгелек базасы — 2850 мм, қосалқы дөңгелектің орналасуына байланысты ұзындығы – 4950 немесе 5070 мм. Демек жаңа өнім негізгі бәсекелесі Tank 500-ден сәл үлкен болады. Бірақ «бес жүздік» V6 моторымен, ал Haval төрт цилиндрлі қозғалтқышпен жүреді.

1 / 7

• 
• 
• 
• 
• 
• 
• 

1 / 7

224 ат күшіне ие (385 Нм) 2 литрлік агрегат 8 диапазонды автоматпен жұмыс істейді. Ал 2.4 литрлік дизельді мотор 184 ат күшін береді әрі 9 сатылы беріліс қорабымен жұптасады. Ең жоғары жылдамдығы сәйкесінше — 180 және 170 км/сағ. Өзге сипаттамасы қазірше белгісіз.

Haval H9 өз елінде 2024 жылдың бірінші жартысында саудаға түседі деген болжам бар. Инсайдерлер H9 жаз аяғына қарай Ресей нарығына шығатынын хабарлады, бағасы 4.3–5.8 млн рубль болады.