Жаңа Haval H6-да батырма аз болады

Haval буыны алмасқан H6-ның салонын көрсетті. Ресми суреттен кроссовердің интерьері түбегейлі өзгергенін байқауға болады. Қытай нарығына арналған H6-ның тұсаукесері 25 сәуірде Бейжің автосалонында өтеді.

Интерьердегі басты ерекшелік ретінде барлық қосымша функцияны басқаратын ортаңғы дисплейді айтуға болады. Haval H6-да физикалық батырма жоқ десе де болады. Дисплейден бөлек шағын аспаптар панелі бар.

1 / 9

• 
• 
• 
• 
• 
• 
• 
• 
• 

1 / 9

Трансмиссия селекторы рөлде орналасқан. Ортаңғы тоннельде басқару элементтері қалмады, онда сымсыз қуаттау, шынтақ тірегіш және ұсақ заттарға арналған орын пайда болды. H6-ның медиажабдығы туралы қазірше толық ақпарат жоқ, бірақ кроссовердің жүйесі жаңарып, жаңа мүмкіндіктерге ие болатыны белгілі.

Бұған дейін Haval кроссовердің сырт пішінін жариялаған. Марка жаңа өнімді модельдің жаңа буыны ретінде ұсынғанымен, ол мотор гаммасы мен платформасын сақтап қалған сияқты. Қытай нарығына арналған H6 177 ат күшіне ие 1.5 литрлік немесе 231 күшке ие 2 литрлік мотормен жүреді. Трансмиссия 7 сатылы робот пен опция түріндегі толық жетекті қамтиды.

1 / 5

• 
• 
• 
• 
• 

1 / 5

Haval H6 біздің елде де осындай мотормен сатылады, бірақ қуаты 150 және 204 күшке төмендеген. Базалық нұсқасы 12.7 млн, толық жетекті нұсқасы 15.4 млн теңге тұрады, ал ең толық жабдықталған кроссоверді 15.9 млн теңгеге алуға болады.