Жаңа Duster-дің тұсаукесері қарашаның аяғында өтеді

Dacia компаниясы танымал Duster кроссоверінің жаңа буынын таныстыруға дайындалып жатыр. Еуропадағы БАҚ өкілдерінің мәліметіне сүйенсек, тұсаукесер 29 қарашада Португалияда өтеді. Жол талғамайтын көліктің платформасы жаңарып, дизельді қозғалтқыштан арылған. Оның орнын гибрид күштік құрылым басады.

Кроссовер CMF-B платформасының біріне негізделеді екен. Осының арқасында көлік кей функцияға ие болады. Бұдан бөлек Duster-дің өлшемдері артуы мүмкін.

«Дастердің» сырт пішінін 2021 жылғы Bigster концептісінің стилінде жасапты. Жарық техникасы жаңарған автомобильдің шанағы қырлы және қатал бола түсті. Еуропа елдерінде қоршаған ортаға зиян қалдық аз бөлетін қозғалтқыш сұраныста болғандықтан, мотор гаммасын қайта қарайды.

Инсайдерлердің мәліметі бойынша кроссовердің базалық нұсқасы 3 цилиндрлі агрегатпен (120 а.к.) жүреді. Арадағы нұсқаға 140 ат күшін беретін 1.2 литрлік қозғалтқыш негізіндегі гибрид құрылым орнатады. Болжам бойынша моторды Renault брендінің E-Tech топтамасындағы автомобильден алады.

Ең қымбат «Дастер» шағын, бірақ жылдамдығы жоғары турбомотор есебінен модель тарихындағы ең қуатты көлік болады. 1.3 литрлік агрегат машинаға 170 ат күшін береді. Беріліс қорабы және жетек түріне қатысты нақты мәлімет жоқ.

Dacia Duster Еуропада 2024 жылдың алғашқы жартысында саудалана бастайды. Кейін кроссоверді Renault бренді атынан басқа елдерге де жібереді. 2025 жылы Dacia топтамасы салоны үш қатарлы, әлдеқайда ірі жол талғамайтын көлікпен толығады.