Жаңа Chery Tiggo 7 Қытайда 4.57 млн теңге тұрады

Қытайда жаңарған Chery Tiggo 7 кроссовері саудаға шыға бастады. Негізгі өзгеріс интерьерде, ол ескі модельге қарағанда технология жағынан жақсарды. Ішкі нарыққа арналған көліктің бағасы 74 900-96 900 юань (4.57-5.9 млн теңге) аралығында болады.

Tiggo 7 ретінде сатылатын модель осы индексті топтаманың ішінде базалық нұсқасы болып саналады. 2024 жылғы кроссовер дизайны басқаша радиатор торын және жарықдиодты ендірмелері бар бампер алды. Бұған дейін Chery ұқсас шешімді кроссовердің гибрид модификациясында қолданды.

Салондағы негізгі жақсарту — 12.3 дюйм болатын біріккен дисплейлер. Компания Tiggo 7-ні жаңарған желдеткіш дефлекторы бар алдыңғы панельмен, D тәрізді рөл және басқаша орналасқан физикалық батырмалардың блогымен жабдықтады. Ортаңғы тоннельдің дизайны өзгерді, қоңыр түсті жаңа әрлеу қосылды. Tiggo 7-нің интерьер архитектурасы қазір Қазақстанда Tiggo 7 Pro Max ретінде сатылатын кроссоверге ұқсайды.

1 / 6

• 
• 
• 
• 
• 
• 

1 / 6

Кроссовердің жабдықтар тізімі жүргізуші ассистенттерінің кешеніне арналған жаңа камерамен және үш ультрадыбыстық сезгектермен кеңейді. Базалық комплектация да, шу мен дірілді оқшаулау деңгейі де жақсарды.

Қытайдағы Tiggo 7-нің күштік құрылым жинағы өзгермеді. Кроссовер 6 сатылы механикалық қораппен немесе вариатормен жұптасқан 156 ат күшін және 230 Нм момент беретін 1.5 литрлік турбомотормен жүреді.

Бір қызығы, бұрын Chery тағы бір жаңарған Tiggo 7-ні көрсетті. Оның бамперлері, радиатор торы және жарық техникасы өзгеше, ал интерьері Exeed брендінің кейбір модельдерін еске салады. Мұндай Tiggo 7 сыртқы нарыққа Tiggo 7 Pro атауымен шығады деген болжам бар. Қазақстандағы Tiggo 7 Pro екі мотормен сатылады: вариатормен және алдыңғы жетекпен үйлесімді 147 ат күші бар қозғалтқышпен немесе роботпен және толық жетекпен үйлесімді 150 ат күшіне ие мотормен. Бағасы — 9.99-12.19 млн теңге.