Жамбыл облысының полицейлері қолдан құжат жасаған екі тұрғынды ұстады. Облыстық ПД хабарлағандай, Шу ауданындағы мамандандырылған ХҚКО қызметкері мен сол мекеменің бұрынғы қызметкері 150 мың теңгеге жалған техникалық паспорт жасап, сатқан. Ер адам құжат дайындаған, ал әйел делдал болыпты.
Олардан күдіктінің атына тіркелген сегіз банк картасы, 41 жалған техникалық паспорт, көшірме жасайтын техника және жалған құжат жасауға арналған 500 пластик жабдық тәркіленді.
Қылмыстық кодекстің 385-бабы 2-бөлігі бойынша тергеу жүріп жатыр. Бұл бап бойынша күдіктілердің әрқайсысы 4 000 АЕК (2022 жылы 12 252 000 теңге) айыппұл төлейді немесе сол мөлшерде түзеу жұмыстарына не 1000 сағатқа дейінгі қоғамдық жұмыстарға тартылады не 4 жылға дейін бас бостандығын шектеу немесе бас бостандығынан айыру жазасына кесіледі.
Кейін «Азаматтарға арналған үкімет» полиция жаңсақ ақпарат таратқанын хабарлады.
«Ұсталғандар Жамбыл облысындағы бөлімшеміздің қызметкері емес. Ұсталған Қанатбай жеке кәсіпкер, кеңсе тауарларын сатып, көшірме жасау және фотосурет шығарумен айналысады. Шу ауданындағы ХҚКО-ның барлық қызметкері қалыпты режимде жұмыс істеп жатыр», — деп хабарлады мемлекеттік корпорация.
Комментариев: 0