Жалған техникалық тексеріс АҚШ-та да бар

Қазақстанда міндетті техникалық тексеріс төңірегінде дау көп. Шыққанына жеті жылдан асқан көлік үшін техбайқау қосымша салық сияқты болып кеткен. Дегенмен мұндай проблема бізде ғана емес, АҚШ-та да бар екен.

Техаста орналасқан ақпарат агенттігі жергілікті тұрғындар жыл сайынғы міндетті техникалық тексерістен өткісі келмейтінін хабарлады. Мұндай тексерісте мамандар шина, тежеуіш, жарық техникасы және қауіпсіздік белдігінің жай-күйі мен зиян газ мөлшерін тексереді. Бірақ Техас тұрғындары техбайқаудан өтпей, жалған диагностикалық карта сатып алады.

Журналистер эксперимент үшін бір шағын көлік тексеретін орынды бақылапты. Сөйтсе онда бір сағат бойы бірде-бір автомобиль келмеген, бірақ деректер базасы осы аралықта 23 машина техбайқаудан өткені жөнінде ақпарат таратыпты.

Бір ғана Техас штатында жалған техникалық тексерістен өткен 5 млн машина жүр деген болжам бар. Шенділер ортақ базадан тексерісті қай орталық таза, қай орталық жалған жүргізетінін білуге болатынын айтады. Бірақ ол үшін әр жазбаны жеке-жеке қарап шығу қажет. Қазір автоматты бақылайтын мүмкіндік жоқ.

Техникалық тексеріс туралы жергілікті сенаторлар пікірі екіге жарылған. Бір тобы тексерістен өтуді қатаң қадағалап, жалған құжатты дер кезінде анықтауды талап етсе, тағы бір тобы міндетті техникалық тексерістен бас тартуды ұсынып отыр, олардың айтуынша заңға бағынатын азамат көлігін өз бетінше тексертіп отырады, олар қажетсіз техникалық қызмет көрсетуге ақша мен уақытын жұмсамағаны жөн, ал жүйені алдағысы келетіндер қалай да бір амалын табады.