Subaru Forester-дің бесінші буыны 2018 жылдың наурыз айында Нью-Йорктегі автосалонда көпшілікке жария болған еді. Жарты жыл өтісімен-ақ, автокөлік қазақстандық нарыққа да жетті. Марканың жергілікті өкілдері тапсырыстарды әлден қабылдай бастапты.
Кроссовердің анағұрлым қолжетімді нұсқасын иелену үшін қалтаңызда 11 млн теңге болуы тиіс. Бұл алдыңғы буындағы көлікпен салыстырғанда 400 мың теңгеге қымбат. EyeSight кешенді қауіпсіздік жүйесіне ие көлік үшін 14 млн қаражат жұмсауға тура келеді, ал ең қымбат форик бағасы 15.3 млн теңгені құрайды.
Бесінші буындағы Subaru Forester-дің түр-тұлғасы төртіншісімен салыстырғанда аса өзгермеген. Кейбір қырынан көз салғанда, екеуін тіпті шатастырып алуыңыз да ғажап емес. Алайда, мұның ішінде SGP модульді платформасының негізінде құрастырылған судай жаңа жол талғамайтын көлік жасырынған. Дәл сондай платформа Subaru XV негізінде де жатыр.
Subaru Forester-дің моторлық гаммасында екі агрегат бар. Олардың екеуі де атмосфералық. Екі литрлік оппозитті қозғалтқыш 150 күш, ал тікелей бүркуге ие жаңартылған 2.5 литрлік мотор — 182 күш береді. Беріліс қорабы бұрынғыдай — шынжырдағы Lineartronic вариаторы. Онымен субарудың фирмалық симметриялы толық жетегі бірлесе жұмыс істейді.
Комментариев: 0