Zeekr Қытайға арналған 001 мен 007-ні жаңартты

Қытайдағы электромобиль өндірушілер арасындағы бәсекелестік бағаны өзгертуге ғана емес, танымал модельдерді жылдам жаңартуға мәжбүрлейді. 13 тамызда Zeekr аспан асты еліне арналған 001 мен 007-нің жаңарған нұсқасын көрсетті.

Zeekr 001 (2025)

2025 жылы шығатын 001 лифтбегінің сырт келбеті өзгермеген. Электромобиль көгілдір және сарғыш түсті шанақ бояуын алды. Салоны Eva дыбысты көмекшісі бар жаңа медиакешенмен және Nvidia Orin X чипіне негізделген автономды басқару жүйесімен жабдықталды.

1 / 3

• 
• 
• 

1 / 3

001-дің Қытайдағы құны 259 000 юаньнан (17.3 млн теңге) басталады, ол бұрынғыдан 10 мың юаньға (667 000 теңге) арзан.

Zeekr 007 (2025)

007 седанының шанақ және салон палитрасына жасыл реңк қосылған, одан бөлек 19 дюймдік дөңгелек дискілерінің қосымша нұсқасы бар. Ішіндегі медиакешен де жаңарып, Eva көмекшісін алды. Ал автономды басқару жүйесі Orin X чиптері, лидар және 30 басқа сенсорға негізделген. Компания өкілдері жүйе жолда болатын мыңдаған жағдайға дайын, 30 түрлі күрделі қиылыстан еркін өтеді, автоматты тежеуіш 120 км/сағ жылдамдықпен қозғалып бара жатқан көлікті тоқтата алады деп айтты. Одан бөлек автоматты тұраққа қойғыш пен тағы бірнеше функция жақсарған.

Бұл модельдің күштік құрылымы түрленді. Zeekr оған өзі жасаған Golden Brick 2.0 батареясын орнатады. Алдын ала мәлімет бойынша оның сыйымдылығы бұрынғыдай (75 кВт·сағ), бірақ қуаттау жылдамдығы кәдімгідей артқан. Машинаны 10 %-дан 80 %-ға дейін 10.5 минутта қуаттауға болады. Бір моторлы түрленім алғашқы жүздікті 5 секундта алса, екі қозғалтқышы бар көлік бұған 3.4 секунд жұмсайды.

1 / 9

• 
• 
• 
• 
• 
• 
• 
• 
• 

1 / 9

007-нің Performance-тан басқа нұсқалары 20 мың юань (1.3 млн теңгеге жуық) арзандады. Комплектациялар тізімінде базалық түрленім жоқ. Енді модельдің бағасы 209 900 юаньнан (14 млн теңге) басталады.

Аталған өзгерістер тек Қытайда сатылатын машиналарға қатысты екенін айта кеткен жөн. Басқа елдерде 001-дің биылғы рестайлингке дейінгі түрі сатылып жатыр. Ал 007-ні бренд Еуропаға да, Қазақстанға да ресми түрде жеткізбейді.