Zeekr электромобильдерінің танымалдығы Қазақстанда айтарлықтай төмендеуі мүмкін. Компания Қытайдың ішкі нарығына арналған автомобильдердің бейресми экспортын бақылауға алу туралы шешім қабылдады, елімізде мұндай Zeekr көп екенін білеміз.
«Сұр» машиналармен байланысты проблема туралы алғашқы сыбыс маусымның екінші жартысында тарай бастады. Параллель экспортпен айналысатын Қытайдағы компаниялар шу шығарды. Кейін желіде өндіруші хабарландыруы бар скриншоттар пайда болды, ал енді шілденің аяғына қарай Tengri Auto ресми расталған ақпаратты Zeekr International-дан алды. Қытай бренді шынында да ішкі нарыққа арналған, бірақ шет елде жүрген модельдерін бұғаттайды.
Барлық «сұр» Zeekr бұғатталмайды. Бренд Қазақстан жолдарында жүрген машиналарға тиіспейді. Автоөндіруші 2024 жылдың 15 шілдесінен кейін шыққан модельдерді бақылауға алады.
«Сұр» Zeekr-дің жағдайы не болмақ
Zeekr International ішкі нарыққа арналған машина Қытайдан тыс жерде табылған жағдайда, жүргізушіге электромобильді отанына қайтару қажет деген хабарлама келетінін айтты. Иесі бірінші ескертуді елемесе, екінші ескерту ретінде медиажүйе өшеді, Zeekr-ге жүгіну қажеттігі туралы хабарлама шығады.
Бұл шара клиенттердің қауіпсіздігін қамтамасыз ету және жергілікті заң мен талаптарға сай келетін автомобильді ресми дистрибьютор арқылы ұсыну үшін қабылданды, деп атап өтті Zeekr International.
Компания Қазақстандағы дилер істемей қалған дисплейді жөндей алмайтынын айтты. Жалғыз шешім — электромобильді Қытайға апару. Бренд болашақта бұл жағдайға тап болатын көлік иелеріне делдалмен бірге шешім табуды ұсынды.
Қытайдан Zeekr әкелу енді мүмкін емес пе?
Олай емес. Экспортпен айналысатын компания арқылы электромобиль сатып алу мүмкін болмайды. Дегенмен Zeekr International Қытайда тұрып жатқан шетелдіктер жеке пайдалану үшін сатып алған көлігін еліне алып кете алатынын хабарлады, ол үшін қажетті құжаттармен қоса тиісті сұратым жіберіп, компаниядан рұқсат алуы керек.
Комментариев: 0