Zeekr-дің жаңа кроссоверіне бір аптада 20 мың алдын ала тапсырыс түсті

Zeekr жаңа 7X моделі нарыққа сәтті шыққанын хабарлады. Маркетинг бөлімінің басшысы Гуань Хайтаоның айтуынша 30 тамызда алдын ала тапсырыс қабылдай бастағалы компанияға бір аптада 20 мың өтінім түскен. Әзірге базалық модификацияның бағасы белгілі, бірақ электрокар Tesla Model Y-дан арзан екені анық.

Модель отбасылық кроссовер класындағы брендтің алғашқы моделі және 007 седанының үлкейген нұсқасы. Паркетник екі түрлі күштік құрылыммен және батареямен шығады, ең қарапайым 75 киловаттық аккумулятор тек базалық 7X-те болады.

Мұндай аккумулятор 421 ат күшін беретін бір қозғалтқышпен жұптасады. Оны толық жетекті модификацияда болатын 100 киловаттық батареямен де жабдықтауға болады. Мұндай кроссоверлер 646 ат күшін беретін екі қозғалтқышпен жүреді, алғашқы жүздікті шамамен 3 секундта еңсереді. Электромобильдің жүріс қоры батарея мен қозғалтқышқа байланысты 605-780 шақырымға жетеді.

Ең арзан Zeekr 7X 239 000 юань (шамамен 16 млн теңге) тұрады, бұл Tesla Model Y-дың бастапқы құнынан 10.9 мың төмен. Компания үздік комплектациядағы электрокардың бағасы 300 мыңнан аспайды деп уәде берді. Кроссовердің саудасы 20 қыркүйекте басталады және оған дейін тағы арзандауы мүмкін.

Бренд бәсекелестік жоғары болғанына қарамастан, сұранысқа ие сегменттегі отбасылық кроссовер көп пайда әкеледі деп үміттенеді. Бірақ Zeekr-дің жағдайы онсыз да жаман емес. Тамыз қорытындысы бойынша сауда жылдан жылға 46 % және шілдемен салыстырғанда 15 % өсті. Компания қаңтардан бері былтырмен салыстырғанда 80 % көп машина сатқан.