Zeekr биыл екі ірі кроссовер мен универсал шығарады

Zeekr 2025 жылға арналған жоспарын жариялады. CarNewsChina бұл туралы брендке иелік ететін Geely концернінің басшысы Энди Ан айтқанын хабарлады. Zeekr топтамасын үш жаңа модельмен толықтырып, жаңа гибрид құрылым ұсынады, сол арқылы саудасын 30% арттыруды жоспарлап отыр.

Zeekr-дің жаңа өнімдері D және E сегментіндегі екі кроссовер болады. Оның бірі қазір жол сынағынан өтіп жатыр. Шпиондық суреттен кроссовердің сырт пішіні үлкен Zeekr 009 вэніне ұқсайтынын байқауға болады. Екі модель де жылдың екінші жартысында саудаға шығады, олар электрлі және гибрид күштік құрылыммен жүреді.

Компания сәуірде Шанхайда өтетін көрмеде Энди Ан Super Hybrid деп атаған ерекше бензоэлектрлі жетекті көрсетеді. Құрылым Geely-дің NordThor EM-i жүйесінің түрленімі болады деген ақпарат бар. Концерн мұндай жүйесі бар автомобильдің жүріс қоры 2.4 мың километрге жететінін әрі 100 шақырымға небәрі 2.67 литр бензин тұтынатынын айтқан.

2025 жылдың II тоқсанында Zeekr бес есікті шанағы бар 007-ні көрсетеді. Фирма оны универсал деп санайды, бірақ ол Zeekr 001 сияқты шутинг-брейкке ұқсайды. Электрокар түрінде жарық көретін машина седаннан алынған 646 ат күшіне ие мотормен жүреді.

Zeekr гибрид модельдердің арқасында 2025 жылы 320 мың автомобиль сатуды жоспарлап отыр. Былтыр 222 мың машина өткізіп, саудасын екі есе арттырғанымен, жоспардағы 230 мың дана межеге жете алған жоқ. Марка сыртқы нарықтарға да баса назар аударып отыр. Еуропадан бөлек АҚШ нарығын игеруге күш салады, қаңтарда өтетін көрмелердің бірінде бренд 001, 009 және Mix модельдерін жұрт назарына ұсынады.