Бас көлік прокуратурасы жолдағы жөндеу жұмысын қабылдаған кезде заңсыздыққа жол ашатын ережені өзгертті. Қадағалау органы хабарлағандай, мекеме қызметкерлері Көлік министрлігінің нормативтік және техникалық актілерін зерттеп, Ұлттық жол активтері сапасы орталығы қолданатын әдістеменің кейбірі трассаны толық жөнделмеген күйде қабылдауға жағдай жасайтынын анықтаған.
Аталған құжат ақау анықталған жағдайда жол жабынының нормативтік сипаттамасын қалпына келтірместен қабылдай беруге рұқсат еткен. Яғни тексерушілер мердігерден ақауды жөндеуді талап етудің орнына ақша ұстап қалу, орындалған жұмыстың құнын түсіру немесе кепілдік мерзімін ұзарту сияқты шара қолдана алады екен.
Бұл әдістеме жолдан кемшілік анықталса, жоба құжатын өзгертуге де мүмкіндік беріпті. Яғни, жолды сапасыз салып, кейін құжатқа өзгеріс енгізу арқылы әу баста жоспар сондай болғандай етіп көрсетуге рұқсат етілген. Енді прокурорлар жауапты орган бекіткен жобаға заңнамаға сай қатаң тәртіппен ғана өзгеріс енуін талап етіп отыр.
Бас көлік прокуратурасының шағымы бойынша мамандар Көлік министрлігіне қарасты Автомобиль жолдары комитетінің бұйрығынан заңсыз норманы алып тастады.
Комментариев: 0