Xiaomi кроссоверінің қуатты нұсқасы шықты

Қытай өнеркәсіп министрлігі жариялаған жаңа сертификат құжатында Xiaomi YU7-нің атауында GT қосымшасы бар қуатты түрленімі тұр.

YU7 алдыңғы бампердегі ірі ауа өткізгіші бар сұсты бастырығымен және артындағы үлкен диффузорымен ерекшеленеді. Басқа аэродинамикалық элементтердің арқасында көліктің өлшемдері өзгерді. Ұзындығы 15 мм, ені 11 мм ұлғайды. YU7 GT-дің басты ерекшелігі күштік құрылымында.

Электромобильдің алдыңғы осінде 391 ат күшін, артында 612 ат күшін беретін моторлар тұр. Жалпы қуаты 1000 ат күшінен асады. Бұған дейін ең мықтысы Max нұсқасы (691 а.к.) еді.

Кроссовердің шассиі өзгере ме, белгісіз. CarNewsChina басылымы машина карбон-керамикалық тежеуіш алуы мүмкін деп жазды. Бағасы 450 000–500 000 юань (32–35.5 млн теңге) болатын сияқты.