Жақында SU7 Ultra гиперкарын таныстырған Xiaomi Нюрбургрингте рекорд жаңартқанын хабарлады. Прототип әйгілі трассада ең жылдам нәтиже көрсеткен төрт есікті автомобиль атанды. Roewe D7 седаны Гиннесс рекордтар кітабына жүріс қоры ең көп гибрид ретінде енді.
Xiaomi өкілдері SU7 Ultra прототипі 20.8 шақырым Нюрбургринг трассасын небәрі 6 минут 46.874 секундта жүріп өткенін айтты. Осылайша батареялы гиперкар Porsche Taycan Turbo GT, Tesla Model S Plaid және Rimac Nevera-дан жылдам нәтиже көрсетті. Алайда бұл көрсеткішке сериялы өндіріске шықпаған SU7 Ultra жетті, оның нәтижесін сатылып жатқан электромобильдермен салыстыру дұрыс емес. Бірақ сериялы Xiaomi SU7 Ultra-ның көрсеткіші бұдан аса төмен болмауы мүмкін.
Марка гиперкардың сипаттамасын жақында жария етті. Модельдің концептісі стандарт SU7-ден аэродинамикасы жақсарған жаңа шанағымен және 1548 ат күшіне ие үш электромоторымен ерекшеленеді. Ол алғашқы жүздікті 1.97 секундта еңсереді, ал ең жоғары жылдамдығы — 350 км/сағ. Саудаға шығатын машина прототиптің үш моторы мен батареясын сақтап қалады, бірақ бағасын төмендету үшін құрылымы қарапайым болуы ықтимал.
Roewe рекорд орнату үшін әдеттегі D7 седанының DMH гибрид түрленімін пайдаланды, ол 112 ат күшіне ие 1.5 литрлік дәстүрлі мотор және 204 ат күшіне ие электромотормен жүреді. Седан 4 күнде Ланчжоу — Үрімші бағытында 2208 шақырым жол жүрді. Бірақ бұл модельдің ресми жүріс қоры — 1.4 мың км.
Жолдағы биіктік айырмашылығы 1.6 шақырым, ал күндіз бен түнгі температура айырмасы 30 градус болды. Соған қарамастан Roewe D7 100 км-ге паспортта көрсетілгендей 4.3 литр емес, 2.49 литр отын тұтынды. D7 мұндай керемет көрсеткішке тұсаукесері әлі өтпеген жаңа инновациялық күштік құрылымның арқасында жетті деген болжам бар.
Осылайша Roewe жүріс қоры 2 мың шақырымнан асатын гибрид шығарған кезекті Қытай маркасы атанды. Бұрын мұндай жетістікке BYD және Chery қол жеткізген.
Комментариев: 0