Xiaomi 1548 ат күші бар SU7 шығарды

Компания SU7-нің ең қуатты және жылдам модификациясын Ultra деп атады. Ол 1548 ат күшін беретін үш қозғалтқышпен жабдықталған және алғашқы жүздікті 1.97 секундта еңсереді. Бренд мұндай көлікті саудаға шығаруды жоспарлап отырған жоқ, бұл Xiaomi-дің жоғары электротехнологияны әзірлеу және қолдану қабілетін дәлелдейтін тәжірибе.

Автомобильдің күштік құрылымына Xiaomi әзірлеген ең қуатты электромоторлар кірді, бұл жаңа технологияның ресми дебюті. Шанағы толықтай карбоннан жасалған Ultra-ның сырт келбеті сериялық SU7-ге ұқсағанымен, жаңа өнім аэродинамика мен салмақ жағынан ерекшеленеді. Суперкардың салмағы 1.9 тонна болса да, әсерлі бодикит 2.1 тоннадан астам қысу күшін береді.

1 / 6

• 
• 
• 
• 
• 
• 

1 / 6

Машина 200 км/сағ жылдамдықты 5.97 секундта, ал 300 км/сағ жылдамдықты 15 секундта жүріп өтеді, максимал жылдамдығы — 350 км/сағ. 6 поршеньді AP Racing жарыс тежеуіштері мен рекуперация жүйесінің тиімді жұмысының арқасында SU7 Ultra-ның 100 км/сағ жылдамдықта тоқтау жолы 25 метрді құрайды.

Xiaomi бұл әзірлеме жалпы жолда жүрмейтін Еуропадағы аналогтармен бәсекеге түсе алатынына сенімді. Қазанда компания SU7 Ultra-ны Нюрбургрингке шығарып, сериялық емес көліктер арасында жаңа рекорд орнатуға тырысады. Оның қарсыластары: 6 минут 5.33 секунд уақыт көрсеткен VW ID.R жарыс прототипі және жақында әйгілі трассаны 6 минут 24 секундта өткен Lotus Evija X.