GM мен SAIC бірлескен кәсіпорнына кіретін Wuling бренді алғашқы концепт-карын ұсынды. Оның негізгі мақсаты — фирмалық дизайнға деген жаңа көзқарасты көрсету, сондай-ақ брендтің Оңтүстік-Шығыс Азия аймағына қызығушылығын меңзеу. Сол себепті прототип Light of ASEAN деген атау алды.
ASEAN — Индонезия, Таиланд, Малайзия, Вьетнам және Камбоджа сияқты он елді қамтитын Азиядағы мемлекеттер қауымдастығы. Wuling онжылдықтың аяғына дейін электромобиль өндірісінің жаңа тізбегін ұйымдастыруды, тіпті жеке инфрақұрылымдық жүйе құруды көздейді.
Light of ASEAN концептісі брендтің жоспарына назар аудартуға тиіс. Футуристік үлкен купе ерекше жарық техникасы және екі қатарлы салонға бірден кіруге болатын жоғары қарай ашылатын есігімен ерекшеленеді. Инженерлер артқы орындықты қарапайым диван сияқты жасаған, ал алдына ультратехнологиялық дизайнға тән орындықтар орнатқан. Рөл мен ықшам аспаптар панелін де сол стильде жасапты. Презентация кезінде концептідегі технологиялар туралы ештеңе айтылмады. Бірақ артқы жағында интеллектуалды роботы бар жылжымалы панельдер тұр, олардың не үшін керек екені белгісіз.
GM мен SAIC шетел нарығын аса қарқынды жаулап жатыр, олар 104 елге миллионнан астам автомобиль жіберген. Wuling брендінің танымалдығы Қытайдан тыс жерде де артатыны анық.
Комментариев: 0