Dongfeng концерніне кіретін Voyah бренді өз көліктерін шетелге бейресми жеткізуге жол бермейді. «Известия» басылымы хабарлағандай, өндіруші бұл қадамға тұтынушыға толыққанды қолдау көрсетілмейтіндіктен және бренд имиджін бұзбау үшін барып отыр. Шетелдегі ресми дистрибьюторлардың жұмысына бұл тосқауыл әсер етпейді.
Voyah Қытайдағы дилерлер мен серіктестеріне автомобиль экспорттаушы компанияларға немесе «сұр» жолмен шетелге шығаратын басқа фирмаларға қайта сатуға тыйым салды. Бұл шектеу брендтің ресми өкілдері бар Ресей сияқты елдерге де қатысты. Компанияның мақсаты — көлікті сервистік қызмет көрсетусіз пайдалануға мүмкіндік бермеу.
Бренд мұндай машинаны медиажүйенің жұмысы арқылы анықтайды. Көлік сатылғаннан кейін медиажүйе ұзақ уақыт қосылмаса, компания машинаны тексере бастайды. Әр қайта сатылған автомобиль үшін дилерге 100 мың юань (шамамен 6.7 млн теңге) көлемінде айыппұл салынады. Осындай жағдай бірнеше рет анықталса, автосалонмен келісімді бұзады.
Компания шетел асқан көліктерге қатысты қандай да бір санкция енгізуді жоспарлап отырған жоқ. Мысалы, Ресейде бренд 1 қыркүйекке дейін саудаланған «сұр» көлік үшін жаңа сервистік бағдарлама ұсынады. Мұндай қосымша кепілдікке орыс тілді борттық медиажүйе кіреді, бірақ құны кемінде 135 мың рубльді (шамамен 700 мың теңге) құрайды.
Биыл жазда Zeekr де осындай шектеу енгізетінін хабарлады, бірақ ол қатаң шара қолданбақшы. 15 шілдеден кейін шыққан және Қытайдан тыс елге бейресми түрде жеткізілген көліктердің медиажүйесі бұғатталады.
Комментариев: 0