Volkswagen жеке платформасынан бас тартады

JAC-тың қатысуымен құрылған Volkswagen Anhui кәсіпорны Қытайдағы электромобиль топтамасына арналған MEB платформасынан бас тартатын болды. Cnevpost хабарлағандай, бұл архитектураны Қытай нарығындағы Volkswagen-нің жаңа серіктесі Xpeng алмастырады. Стратегияның өзгеруі жаңа модельдердің шығуын кемінде бір жарым жылға шегереді.

Volkswagen 2024 жылдың бірінші жартысында Қытайда MEB платформасына негізделген ID.UX атты электрокар топтамасын жасауды жоспарлаған. Шілдеде алғаш болып ID.Unyx кросс-купесі саудаға шықты. Дегенмен жергілікті клиенттер оған қызықпады. Қазірге дейін небәрі бірнеше жүз данасы ғана сатылды.

VW Anhui Қытай нарығын басқа жолмен жаулауға бел буып отыр. Компания қымбат MEB платформасында жаңа модель әзірлеуден бас тартып, Xpeng инженерлерімен бірге жасап жатқан CEA (China Electrical Architecture) архитектурасына көшу туралы шешім қабылдады. Сол себепті өндіруші мерзімді қайта қарауға мәжбүр. Бұрын ID.Unyx артынан бірқатар жаңа өнім шығуға тиіс болса, енді VW Anhui электромобильдерін келер жылдың аяғында көрсетеді, ал нарыққа олар 2026 жылдан ерте шықпайды.

Қазір сатылып жатқан автомобильге келетін болсақ, бастапқыда оның бағасы кемінде 209 900 юань (14.3 миллион теңге) болған, бірақ қазір ID.Unyx моделі үшін 40 000 юаньға (2.7 миллион теңге) дейін жеңілдік бар.