Volkswagen Taos өндірісі Нижний Новгородтағы ГАЗ зауытында басталды. Ұзындығы 4.4 метр болатын шағын кроссовердің Škoda Karoq-пен ұқсастығы бар. Екі автомобиль де MQB платформасына негізделген, алдыңғы және толық жетекті нұсқалары бар. Чех моделі де ГАЗ зауытында жасалады.
Volkswagen Taos ЕЭО нарығына екі түрлі қозғалтқышпен ұсынылады. Біріншісі 110 ат күшіне ие 1.6 литрлік атмосфералы мотор. Ол 5 сатылы механика немесе 6 сатылы автоматпен жұмыс істейді. Мұндай машиналар тек алдыңғы жетекті болуы мүмкін. Екіншісі 150 ат күші бар 1.4 литрлік турбомотор. Ол моножетекті нұсқадағы 8 сатылы автомат немесе толық жетекті 4Motion жүйесімен бірге 7 сатылы роботпен жұмыс істейді.
Кроссовер төрт комплектацияда сатылады: Respect, Status, Exclusive және JOY! Автомобиль базалық нұсқада жарықдиодты шам, алты қауіпсіздік жастығы, цифрлы аспаптар панелі, алдыңғы орындықтарды жылытқыш, салқындатқыш, бейімді круиз-бақылау, орталық консольдегі бірнеше USB-C порты және 6.5 дюймдік мультимедиа кешенімен ұсынылады.
Ал қымбат нұсқасында 10 дюймдік экраны бар мультимедиа кешені, екі аймақты климат-бақылау, парктроник немесе артқы көрініс камерасы, артқы орындықтарды жылытқыш және аспаптар панелінің орнына үлкен дисплей болады.
Volkswagen Taos Ресейде ғана емес, Қазақстанда да саудаланады. Көліктің қашан таныстырылатыны және бағасы қанша болатыны қазірше белгісіз. Кроссовер Hyundai Creta (7.3-9.2 млн теңге), Kia Seltos (10.8-11.5 млн теңге) және екінші буындағы Renault Duster-ге (7-10.1 млн теңге) бәсекелес болады.
Метки: Volkswagen, Taos,
Комментариев: 0