Volkswagen-нің біздің елдегі топтамасына марка шілденің ортасында таныстырған Talagon қосылады. Бренд оны әу баста қытайларға арнап жасаған.
MQB Evo платформасына негізделген Talagon ел алдына 2021 жылы Шанхай автосалонында шықты. Былтыр рестайлингтен өтіп, сырт келбеті біршама өзгерді. Енді ол Қазақстанға келеді.
Көлік типін мақұлдау құжатына сәйкес автомобильдің 6 және 7 орынды екі нұсқасы сатылады. Ұзындығы 5.1 метрден асатын, дөңгелек базасы 2.98 метр Talagon 272 ат күші мен 400 Нм момент беретін 2 литрлік турбомотормен ғана жүреді. Беріліс қорабының типі жазылмапты, бірақ Қытайда ол 7 сатылы DSG және толық жетек жүйесімен жабдықталады.
Көліктің ішінде 10.3 дюймдік аспаптар панелі, 15 дюймдік медиакешен экраны, алдыңғы жолаушы қолданатын 11.6 дюймдік тачскрин, сымсыз қуаттағыш, екі аймақты климат-бақылау, панорамалық шатыр, желдеткіші мен жылытқышы бар орындықтар, 12 динамикті аудиожүйе, озық көмекшілер кешені және т.б. болады. Дегенмен бұл опциялардың қайсысы бізге жететіні белгісіз.
Комментариев: 0