Volkswagen Passat жүргізушісі қазынаға 6.6 млн теңге қарыз болған

Түркістан облысындағы Шымкент — Самара тас жолында полицейлер жол ережесін бұзғаны үшін мемлекетке 6.6 млн теңге берешегі бар Volkswagen Passat B3 жүргізушісін ұстады. Бұл туралы облыстық полиция департаменті басшысының бірінші орынбасары Бағланбек Айтпаевқа сілтеме жасап, Polisia.kz порталы хабарлады.

ІІМ өкілі жүргізуші қандай баптар бойынша айыппұл арқалағанын нақтыламады, бірақ басым бөлігі жылдамдықты асыруға байланысты екенін болжау қиын емес. Материалда келтірген статистика бойынша айыппұлдың 80 %-і жылдамдық асырғандарға тиесілі екен.

Жол сақшылары Volkswagen Passat-ты айып тұрағына жіберді.

Жалпы қарыз нарықтағы Passat B3-тің орташа құнынан бірнеше есе жоғары екенін айта кетейік. Көне автомобильдің құны — 1.1-1.5 млн теңге, ал сәл қымбат универсал 3.2 млн теңге тұрады.