Volkswagen Еуро-7 стандартын кешірек енгізуді сұрады

Бірер жылда Еуроодақ елдерінде іштен жанатын қозғалтқыштан шығатын зиян газ мөлшерін тағы азайтатын жаңа экологиялық талап күшіне енеді. Автоөндірушілер қазір Еуро-7 стандартына өту мүмкін емес әрі ол бизнеске тиімсіз деп санайды, компаниялар шағын модель шығарудан бас тартуға мәжбүр болады.

Volkswagen Еуро-7 стандартын енгізу мерзімі туралы позициясын айтты. Reuters хабарлағандай, концерн жаңа норма 2025 жылғы шілдеде емес, 2026 жылы тамызда күшіне енгенін қалайды, ал модельдік топтама толықтай жаңа стандартқа сай келсін деген талап 2027 жылғы күзге қалса дейді. Әйтпесе бірден бірнеше модель өндірісін тоқтатуға тура келеді екен.

Сондай-ақ Volkswagen тежеуіш қалыбы мен шинадан шығатын жарамсыз бөлшекті экологиялық стандартқа қазірше енгізбеуді сұрап отыр. Концерн бұл талапты қанша уақыт кейінге шегергісі келетінін айтпады, тек қазір жаңа нормаға сай шина шығаратын бірде-бір өндіруші жоқ екенін еске салды.

Еурокомиссия Volkswagen келтірген аргументті ескере ме, белгісіз. Қазір шенділердің арыны қатты. Олардың айтуынша зиян газ мөлшерін азайту кезек күттірмейтін шаруа, сол үшін Еуро-7 стандартын барынша тез енгізу керек.