«Волга» иесі аударылатын нөмір үшін ауыр жаза арқалады

27 қаңтардың кешінде полицейлер Қарағанды қаласында Нұрлан Бесімбаевты тоқтатып, машинасын тексерген. Тәртіп сақшылары автомобиль мемлекеттік нөмірді аударып қоюға мүмкіндік беретін механизммен жабдықталған деп танып, Әкімшілік кодекстің 590-бабы 4-бөлігі бойынша («мемлекеттік нөмір белгісін тануға кедергі келтіретін немесе оны жасыруға не өзгертуге мүмкіндік беретін құрылғымен немесе материалмен жабдықталған көлікті басқару») хаттама толтырыпты.

View this post on Instagram

A post shared by ВОЛГА КАЗАХСТАН 🇰🇿 (@volgakazakhstan)

«Жүріп келе жатқанда нөмір аударылған жоқ, ол анық әрі жақсы көрініп тұрды. Полицейлер мені тоқтатқан соң көліктің жанына келіп, нөмірді аударуға мүмкіндік беретін механизм бар деді. Мен оларға бұл зауыттық құрылым екенін, арнайы технологиялық тесігіне іске қосу тұтқасын, яғни „қисық стартер“ орнатуға арналғанын түсіндірдім. „Москвич“, „Волга ГАЗ-21“ сияқты машиналарда да осындай механизм бар», — деді Нұрлан Tengrinews.kz-ке.

View this post on Instagram

A post shared by @hochu.pitsu

«Полицейлерге интернеттен дәл осындай ГАЗ-24-тің видеосы мен фотосын көрсеттім, бірақ олар бәрібір сенбеді. Нөмірді жасыратын ниетім де, мүмкіндігім де болған жоқ. Оның үстіне салоннан шықпай кронштейнді аударуға жағдай жасайтын жетек жоқ. Жалғыз жолы — көліктің алдына барып, нөмірді қолмен жылжытып, қисық стартерді салып, машинаны оталдыру. Стартерді алып тастаса, нөмір бірден орнына қайтады әрі жүріп келе жатқанда аударылмайды», — дейді жүргізуші.

Бірақ полицейлер айтқанынан қайтпай, істі сотқа жолдаған. Мұндай әрекетке барған азамат 5 тәулікке дейін қамалып, бір жылға жүргізуші куәлігінен айырылады. Нәтижесінде сот Нұрланды бір тәулікке қамап, 12 айға көлік басқару құқығынан айырды.

Теория жүзінде Қазақстанда «Волга» иелері, соның ішінде ГАЗ-21 мініп жүргендер де жауапқа тартылуы мүмкін. Бірақ бұл жүйе зауытта нақты мақсатқа бола жасалған.

Сотта Нұрлан Қазақстандағы басқа ГАЗ-24-терде мемлекеттік нөмір дәл осылай орнатылатынын көрсететін фотосурет ұсынған. Өйткені зауыттық құрылым осылай жасалған. Заң талабына сай мемлекеттік нөмірді орнатуға болатын жалғыз орын осы. Нұрлан бұл машинаны төрт жылдан бері мініп жүр, сол аралықта еш қиындықсыз техникалық тексерістен өткен. Бірақ судья жүргізушінің дәлелдерін елемепті.

Нұрлан бұл үкімге қарсы шағымдануды жоспарлап отыр. Оның айтуынша заңнамаға «кейіннен орнатылған» және «зауыттық» жабдық ұғымын енгізу қажет. Өйткені автомобильдің штаттық құрылғысы (әсіресе ретро көліктерде) техникалық регламентті бұзбайды.