«Волга» бренді қайта жанданады

Ресейдің сауда және өнеркәсіп министрі Денис Мантуров аңызға айналған «Волга» бренді қайта нарыққа шығуы мүмкін деп мәлімдеді. «РИА Новости» таратқан ақпаратқа сүйенсек, шенді алғашқы көліктер 2024 жылдың жазында жарық көреді депті. «Волга» өнімдерін Нижний Новгородтағы ГАЗ зауытында құрастырады, бұл кәсіпорын Volkswagen кеткелі тұралап қалған.

Денис Мантуров марканы қайта нарыққа шығаруға технологиялық серіктес көмек беретінін атап өтті. Ол ешкімнің атын атамады, бірақ министрдің айтуынша жобаға қатысуы ықтимал төрт компаниямен келіссөз жүріп жатыр екен. Алдын ала мәлімет бойынша кәсіпорын локализация деңгейі жоғары автомобиль өндірісін қолға алады.

Бұрын Renault-ға тиесілі болған зауытта қазір «Москвич» модельдері соған ұқсас схемамен шығады. Дегенмен министр процесті қадағалайтын серіктес жергілікті компания болады деді.

Шенді былтыр маусымда сол тектес мәлімдеме жасаған. Ол «Волгадан» бөлек «Победа» бренді қатарға қосылатынын айтты. Бұл маркаларды Skoda негізінде шығаруды кезінде аустриялық бизнесмен Зигфрид Вольф ұсынып, Ресей билігінен қомақты несие сұрап еді.

Алғашқы «волгалар» ГАЗ конвейерінен 1956 жылы түскен. Ол 2010 жылға дейін шықты. Бірақ соңғы бір-екі жылда өңі өзгерген Chrysler Sebring моделі Volga Siber атауымен сатылды.