Mercedes-Benz G 500-дің саны шектеулі Final Edition нұсқасын таныстырды. Компания ашық жарияламаса да, арнайы нұсқа атауына қарап, V8 геликтің мотор гаммасынан алынатынын білуге болады. Арнайы көліктің бағасы 196 мың еуродан (96 млн теңге) басталады.
Final Edition-ның стандарт G 500-ден айырмасы аз. Ол үш түрлі шанақ түсі (қара, ақ және зәйтүн түс), 20 дюймдік дөңгелек дискісі, нұсқа аты жазылған көптеген тақтайша және жапсырмасымен ерекшеленеді. Кілтке монета тәрізді естелік тақта жапсырыпты. Айнадағы проектор есік ашылғанда асфальтқа Stronger than Time деген жазу «жазады».
Мұндай G 500-дің салоны, төбесі және жүксалғышы наппа былғарысымен қапталған. Бұдан бөлек бренд машинаны жайлы кресло және Burmester аудиожүйесімен жабдықтапты. Техникалық жағында өзгеріс жоқ. Стандарт 4 литрлік V8 моторы 421 ат күшін (610 Нм) береді.
Final Edition-ның 1.5 мың данасы ғана шығады. Олар 2024 жылғы наурызға дейін жарық көреді, содан кейін модельдің мотор гаммасында үлкен өзгеріс болады. Бірақ компания 8 цилиндрлі моторды барлық «Гелендвагеннен» алып тастамайды, AMG G 63 біраз уақыт осындай қозғалтқышпен жүреді.
Комментариев: 0