Утиль алымын жақтайтын петиция жарияланды

25 мамырда «Халық табысын арттыру! Өнеркәсіпті дамыту!» атты петиция Epetition. kz порталына шығып, үш күнде 10 мыңнан астам қол жинады. Үндеу авторлары үкіметті «сұр импортқа тосқауыл қоюды күшейтіп, отандық өндірісті қолдау шараларының тиімділігін арттыруға, жергілікті өндірісті дамытуға бағытталған бастамаларды қолдауға, осы салаға инвестиция тартуға және ынталандыруға, отандық кәсіпорындардың өсуіне қолайлы жағдай жасауға» шақырады.

Бұл үндеу утиль алымы мен бастапқы тіркеуді төлемеу туралы петиция 50 мыңнан астам қол жинаған соң пайда болды. Жаңа жолдауда утиль алымын жақтау туралы тікелей сөз болмаса да, «қатаң протекционистік шаралар енгізу және отандық бизнесті қолдау — дамыған елдерде кең тараған және тиімді тәжірибе» деп жазылған.

Ешкім біреудің жеке мүддесіне бола экономикалық тәуелсіздігінен бас тартпайды. Ақша елде қалуға тиіс! — деп мәлімдеді петиция авторлары.

«За нами уже выехали» телеграм-каналында жасырын дереккөзден Qarmet (бұрынғы Arcelor Mittal) қызметкерлері бұл петицияға «ерікті-мәжбүрлі» түрде қол қойғаны туралы мәлімет пайда болды. Бұл компанияны Андрей Лаврентьев басқарады, сондай-ақ ол құрамына автосалондар мен Қостанайдағы автомобиль құрастыратын кәсіпорындар кіретін «Allur компаниялар тобының» директорлар кеңесінің төрағасы. Өткен аптада Qarmet автомобильді қайта өңдеу және утилизациялау зауытын алды деген ақпарат шыққан.

Утиль алымын алып тастауды Қазақстан тұрғындары бұған дейін де бірнеше рет талап еткен. Отандық депутаттар да оны алып тастауды ұсынды, бірақ үкімет бас тартып келеді. Былтыр Жоғары аудиторлық палата утилизация жүйесі белгіленген мақсатқа жетпеді деп мәлімдеді.