Үшінші буын Porsche Panamera Қазақстанға келді

Porsche үшінші буын Panamera-ны былтыр қарашаның аяғында ресми түрде таныстырған. Жаңа өнімнің сырт келбетін алдыңғы буынмен шатастырып алуға болады, бірақ салон мен техника жағынан өзгеріс көп. Базалық нұсқада үш дисплейі бар алдыңғы панель, екі клапанды бейімді амортизаторлары бар аспа және екі камералы пневмобаллон бар.

Әлемдік дебюттен бірнеше ай өткен соң брендтің Қазақстандағы өкілдері лифтбек елімізде саудаға шыққанын хабарлады. Қазақстанға компания Panamera-ның базалық артқы жетекті түрленімін, толық жетекті Panamera 4 нұсқасын, сонымен қатар қосылатын гибрид түріндегі Panamera Turbo E-Hybrid-ті ұсынады.

1 / 6

Porsche Panamera

1 / 6

Алғашқы екі нұсқа 2.9 литрлік жаңарған V6 турбомоторымен жүреді. Агрегат 353 ат күшін және 500 Нм момент береді, бұл екінші буын модельден 23 ат күшіне (50 Нм) жоғары. Моножетекті нұсқа алғашқы жүздікті 5.2 секундта еңсерсе, Panamera 4 4.8 секунд жұмсайды.

Panamera-ның бағасы Қазақстанда 138 998 еуродан (67 миллион теңге) басталады. Атауында «4» қосымшасы бар толық жетекті модель кем дегенде 144 278 еуро (69.6 млн теңге) тұрады. Бренд ауқымды опция ұсынатынын ескерсек, автомобильдің нақты құны әлдеқайда жоғары болуы мүмкін.

1 / 6

Porsche Panamera Turbo E-Hybrid

1 / 6

Үздік Panamera Turbo E-Hybrid 8 сатылы PDK роботымен біріккен 190 ат күші бар жаңа электрлі қозғалтқышпен және 25.9 киловатт батареямен үйлесімді 4 литрлік V8 турбомоторымен жабдықталады. Күштік құрылым 680 ат күшін (930 Нм) береді, тек электрлі мотормен жүріс қоры 93 шақырымға жетеді.

Panamera Turbo E-Hybrid алғашқы жүздікті 3.2 секундта еңсереді, максимал жылдамдығы — 315 км/сағ. Гибрид модификацияның бастапқы құны — 248 426 еуро (шамамен 119.8 млн теңге).

Үшінші буын Porsche Panamera-ның Қазақстандағы тұсаукесері аясында неміс брендінің өкілдері биыл модельдің кем дегенде 20 данасын, ал жалпы шамамен 550 көлік сатуды көздеп отырғанын айта кетті.

Комментариев: 0