Бүгін Қасым-Жомарт Тоқаевтың төрағалығымен Төтенше жағдай жөніндегі мемлекеттік комиссияның кезекті отырысы болды.
«15 сәуірде төтенше жағдай режимі туралы қаулының мерзімі аяқталады. Қазірдің өзінде төтенше жағдай режимін ең кемі сәуірдің аяғына дейін ұзартуға тура келетіні түсінікті болып отыр. Біз коронавирус індетіне шалдығудың шарықтау шегіне әлі жеткен жоқпыз. Эпидемиямен байланысты жағдайды жеңілдетуге болмайды. Сол себепті астана, Алматы, Шымкент пен тиісті облыстардағы карантин режимін ұзартуды тапсырамын. Мұның оңтайлы шешім еместігін түсінемін, себебі халық көшеге шығып, қалыпты тіршілікке оралуды қалайды. Бірақ карантин режимін сақтап, оқшауланудан басқа амал жоқ», — деді мемлекет басшысы.
ҚР президенті ел азаматтарының үйде отыруы — бұл отандық және халықаралық вирусолог мамандардың кеңесі екендігін атап өтті.
Мемлекет басшының айтуынша, ең алдымен ірі қалалардағы шағын және орта бизнесті тоқыраудан шығару қажет. Әкімдіктер қатаң санитарлық-эпидемиологиялық режимді қамтамасыз ете алатын кәсіпорындардың тізімін жасауы тиіс. Өңірлердегі дағдарысқа қарсы штабтар жұмыс орындарын тексеріп, қызметкерлерді жеткізу тәртібін және басқа да техникалық мәселелерді нақтылайды. Соның нәтижесінде Мемлекеттік комиссия тиісті кәсіпорындардың жұмысын қайта жандандыру жөнінде шешім қабылдайды.
Комментариев: 0