Үндістан электрокар салығын азайтады

Үндістан билігі электромобиль импортына қатысты ұстанымын өзгертті. Билік баж салығын азайтады, бірақ автоөндірушілер бірнеше талапты орындауы керек. InsideEVs басылымы бұл өзгеріске Tesla компаниясы мен Илон Масктың өзі әсер еткенін хабарлады.

Қазір Үндістанға электрокар кіргізу үшін көлік құнының 100 %-ы мөлшерінде салық төлеуге тура келеді. Билік тарифті 15 %-ға дейін төмендетуді шешті. Ол үшін өндіруші бірқатар шартты орындауы қажет.

Ең бастысы — Үндістанда өндіріс орнын ашу. Компания жаңа кәсіпорын ашу үшін үш жылда кемінде 500 млн доллар инвестиция салуы керек. Сондай-ақ Үндістанда шыққан өнімнің локализация деңгейі бес жыл ішінде 50 %-ға жетуі қажет. Жеңілдікті тарифпен жыл сайын 8 мың ғана машина кіргізуге болады.

Былтыр Tesla Үндістандағы кәсіпорнын дамытуға 2 млрд доллар жұмсауға дайын екенін жариялады. Компания қай модельдерді шығаратынын хабарлаған жоқ, бірақ Үндістандағы зауыт негізінен бюджеттік модельдер өндіреді. Мысалы, Model 3, Model Y және әлі жарық көрмеген Model 2 (Project Redwood).

Үндістан билігі жаңа талап бір компанияның мүддесі үшін емес, кез келген өндіруші үшін қабылданғанын айтты. Олар бұл қадамға елдегі электромобиль үлесін арттырып, экологияны жақсарту үшін барып отыр. Өйткені әлемдегі ауасы ең лас 10 қаланың алтауы осы елде деген ақпарат бар.