Украинаның көлік нарығы елге осы уақытқа дейін Ресейден жеткізіліп келген бірнеше үлгіден айырылуы мүмкін. Әңгіме тек Lada мен UAZ жайында емес, Chevrolet Niva, Volkswagen Polo, Kia Rio, сонымен қатар Hyundai Solaris пен Creta да Украинаға кіргізілмейді. Мәселе КАМАЗ, ГАЗ жүк көліктері мен ПАЗ автобустарына да қатысты.
Украинада 1 шілдеден бастап ел аумағына Ресейде құрастырылған автокөліктер, жүк көліктері, мотоциклдер мен тракторларды импорттауды шектейтін құжат күшіне енеді.
Ресейлік БАҚ хабарлағандай, автоөндірушілер көрші ел нарығында біршама қиындықтар туындайтынына дайын болыпты, алайда олар баж салығы 5 %-ға көтеріледі деп күткен, олай болғанда автокөліктерге сұраныс төмендегенмен, сатуға мүмкіндік болатын еді.
Анықтама ретінде айта кетсек, 2018 жылы Украина нарығының бес пайызы ресейлік темір тұлпарлардың үлесінде болатын. Ең жоғарғы сұранысқа ие 20 көлік тізімінде бір де бір ресейлік көлік болған жоқ, ал Hyundai жыл басынан бері питерлік зауытта құрастырылған Solaris пен Creta-ны жеткізуін доғарған.
Комментариев: 0