Жол талғамайтын көлік жұрт назарына ілігіп, тіпті ол жайлы Fox News арнасы хабарлаған. Бағасы 26 400 доллардан басталатын және бес жылдық кепілдігі бар Bremach 4×4 өзі қатарлы Toyota, Ford және Jeep өнімдерінен тартымды көрінеді.
Экспортқа шығатын «Патриотқа» 150 ат күшіне 2.7 литрлік ZMZ Pro бензинді моторы орнатылған. Қозғалтқыш француздар жасаған 6 сатылы Punch Powerglide автоматымен жұптасады. Бірақ капот астына кейін Ford не GM өндірген V8 қойылуы мүмкін деген болжам бар. УАЗдың шетелдегі серіктестері ресейлік агрегаттардан жиі бас тартады, ал оның себебін түсіндірудің қажеті жоқ сияқты.
АҚШ-та автомобильге әлден тапсырыс беруге болады. Ол үшін алдын ала 100 доллар төлесе жеткілікті. Bremach жеткізушісі берген мәлімет бойынша қазір 3.8 млн долларға тапсырыс түсіпті, демек көлікке қызыққандар аз емес деуге негіз бар.
Bremach 4×4-тің болашағына ресми ұсыныстан бөлек, бұрын иелік еткен жүргізушілер мен сырттай бағалаған адамдардың пікірі де үлкен ықпал ететіні анық. Әзірше бұл тұрғыда жұрттың көзқарасы алуан түрлі. Бірақ көбі Made in Russia өнімдеріне күмәнмен қарайды. Оны мына жазбалардан аңғаруға болады:
kaycharles
Краш-тест қалай өткені қызық. Егер олар оны арзан сатып, қауіпсіздік үшін қажет DOT және EPA стандартына, отын пайдалану тиімділігі мен зиян газ шығару нормаларына сәйкес етсе, мен таңғалар едім.
Amerika.is.becoming.braindead
Бұл Kia Sportage-бен будандасқан Isuzu Trooper II сияқты көрінеді. Дегенмен тым жоғары бағаланған Ford, Chevy, Dodge және Toyota автомобильдерімен салыстырғанда арзан көлік жақсы сатылатынына күмән жоқ.
Mohammad Taqi
Мен ресейлік көліктермен жүргенмін. Бір айтарым, олар сенімді емес, арзан жасалған әрі дұрыс жобаланбаған. Ескі дизайн, ескі технологиялар, егер жөндеуге мүмкіндігіңіз болса жасаңыз, ол арзан емес. Бұл машина Ресейде мұнша тұрмайды, демалыста ойыншық ретінде пайдалануға жарап қалар.
Mechine
Ол арақ ішетін автопилотпен жеткізіле ме?
FrankNPrecise
1957 жылы америкалықтар орыстар артта қалған деп күліп еді. Кейін орыстар спутникті іске қосқанда, жұрт езуін жиды. Мен олардың баллистикалық ракетамен емес, америкалық жол талғамайтын көліктермен қалай бәсекелесетінін көргім келеді.
Ульяновск автозауытын жуырда тағы бір үлкен өзгеріс күтеді. «Коммерсант» басылымы зауыттың қазіргі иесі Sollers холдингі кәсіпорынды бейінді емес активтерден арылтып, шанақты қалыптау, дәнекерлеу, бояу мен құрастыру желісін ғана қалдыруды жөн көріп отырғанын хабарлады.
Комментариев: 0