УАЗ мерейтойға орай 120 «буханка» шығарады

Ульяновскідегі автозауыт ерекше «буханка» өндірісін бастады. Жол талғамайтын УАЗ СГР микроавтобусы УАЗ-450 моделінің 65 жылдығына арналады. Конвейерге 120 машина тұрады, бағасы 1 625 000 рубльден (7.75 млн теңге) басталады.

Автомобиль 7 орынды УАЗ СГР экспедициялық нұсқасына негізделген. «Буханканы» күштік бампер, астын қорғайтын құрылғы, қосалқы дөңгелек ілетін кронштейн, фаркоппен жабдықтайды. Одан бөлек төбесінде жүксалғыш және саты болады. Дөңгелегін Maxxis AT980 резеңкесімен (225/75R16) қаптайды.

Мамандар автомобильді сыйымдылығы жоғары аккумулятор мен белдік сапундарының көмегімен жақсартады.

Арнайы модель сары не жасыл түсті «Раптор» бояуымен ерекшеленеді. Интерьерін су жұқтырмайтын сіңіргімен өңделген матамен қаптап, еденіне тайғанауға жол бермейтін жабын төсейді. Үстінен 45 мың рубль төлеп, дифференциал бұғаттағыш орнатуға болады.

Күштік құрылымында өзгеріс жоқ. Автомобиль 112 ат күшіне ие ЗМЗ-40911 моторымен жүреді. Экологиялық класы Еуро-0 стандартына сай келетін агрегат BAIC концерні жасаған 5 сатылы механикамен жұмыс істейді.

Саны шектеулі партияның басым бөлігіне елдер әлден тапсырыс беріп қойыпты.

Болашақта УАЗ өнімдеріне 130 ат күшін беретін 2 литрлік дизельді қозғалтқыш пен 6 сатылы механика орнатуды жоспарлап отыр. Одан бөлек марка қазір «Патриот» топтамасын рестайлингтен өткізу жұмысымен айналысып жатыр.