Тым аласа «жетілік» жүруден қалды

Челябинск көшелерінің бірінде куәгерлер жүре алмай әбігерге түскен автомобильді көрді. «Челябинск с огоньком» телеграм-арнасы жариялаған видеодан оның жолында еш кедергі тұрмағаны байқалады, ВАЗ-21074 көптеген өзгерістен жүре алмай қалғанға ұқсайды.

Видеоны көргендер көліктің клиренсі тым төмен болғандықтан осындай қиындыққа тап болды деп топшылады. Ескі седанның дөңгелектері аркаға кіріп кеткен, алдыңғылары тіпті ішке қарай бүгіліп қалыпты. Көлік тізгініндегі азамат stance мәдениетін жақсы көретін сияқты.

Тәртіп сақшылары автомобилист заң бұзғанын да анықтады. ВАЗ-21074 тіркелмеген болып шықты, жүргізушіде міндетті сақтандыру полисі жоқ, көлік әйнектерін шамадан тыс қараңғылаған, ал артқы терезедегі «мүгедек» деген жапсырма негізсіз екен.

74.ru порталының мәліметіне сүйенсек, тәртіп сақшылары Челябинск тұрғынының атына төрт хаттама толтырған. Жүргізуші 1800 рубль (шамамен 8.5 мың теңге) айыппұл төлеп, алты айдан бір жылға дейін көлік жүргізу құқығынан айырылады. Ал «Лоурайдерді» тәркілейді.