2017 жылы құрылған түркиялық TOGG компаниясы ақыры сериялы өндірісін бастады. Алғашқы өнімі электрлі кроссовер, қазірше атауы белгісіз машина Tesla Model Y және Volkswagen ID.4-пен бір деңгейде болады.
Кроссовердің сырт пішіні алғаш рет 2019 жылы көрсетілді. Дизайнын Pininfarina ательесі жасаған. Концепт пен сериялы машина арасында айырмашылық аз. Тек қарапайым есік тұтқасы мен камераның орнын басқан әдеттегі айнаны айтуға болады.
Электрлі модель туралы толық мәлімет жоқ, бірақ қолда бар ақпарат бойынша оның бірнеше түрленімі болады. Базалық нұсқа артқы жетекті, 272 ат күшіне ие мотормен жүреді, жүріс қоры — 300 км, ал үздік нұсқасына жалпы 544 күш беретін екі мотор орнатылады, толық жетекті болады. Қытайлық Farasis компаниясының литий-ионды батареясы 500 шақырым жол жүруге жетеді.
TOGG кроссовері 2023 жылдың бірінші тоқсанында сатылымға шығады, бағасы 43 мың доллардан басталады. Машинаны ең алдымен губернатор немесе шетелдегі дипломатиялық қызмет өкілдері сияқты Түркия шенділері мінеді.
TOGG 2017 жылы бес ірі компанияның бірлескен жобасы ретінде құрылған. Бірақ біреуі ғана (BMC) автоөндіріспен айналысады, қалғаны өзге сала өкілі, мысалы, сыра шығаратын Anadolu Group және Turkcell ұялы байланыс операторы. Марка 2019 жылы алғашқы концептісін көрсетіп, Гемлик қаласы маңында зауыт сала бастады. 3.7 млрд доллар жұмсалған өндіріс орнында жылына 175 000 машина шығаруға болады. TOGG аталған кроссоверден бөлек, тағы төрт модель жасауды жоспарлап отыр. Келесі өнім С-класты седан болады, ол 2024 жылы конвейерге тұрады.
Комментариев: 0