Gooding аукционы 1960 жылғы Ferrari 250 GT кабриолетін саудаға қойды. Өте көне болғанына қарамастан ол 1–1.3 млн долларға өтеді деген болжам бар. Бұған модельдің сирек кездесетіні және тарихы себеп болып отыр.
1960 жылдары Ferrari мен Pinin Farina небәрі екі жүз дана 250 GT Series II кабриолетін шығарған, демек ол коллекцияда тұруға лайық сирек кездесетін автомобильге айналды. Сатушылар бұл экземплярдың өткен өмірі қызыққа толы екенін айтты.
Кабриолеттің алғашқы иесі — италиялық ханзада, плейбой әрі меценат Алессандро Дадо Русполи, ол сол кезде Рим богемасының әйгілі өкілі болатын. Ол Сальвадор Дали, Брижит Бардо, Пабло Пикассо және Одри Хепбёрн сынды адамдармен араласқан. Бір жылдан кейін ханзада қымбат ойыншықтан жалықты, 1963 жылы Ferrari 250 GT-ді атақты актер Роберт Вагнер алды.
Ол автомобильді екі-ақ жыл мінген, сол аралықта кабриолет 1964 жылы шыққан «The Pink Panther» («Розовая пантера») фильміне түсті. 1970 жылдардың аяғына дейін 250 GT бірнеше адамның қолынан өтіп, бірнеше континентті аралады, 1979 жылы Калифорнияда Дональд Николс есімді адамның меншігіне өтті. Ол спорткарды жөндеп, жаңартуды жоспарлаған. Бірақ машинаның бояуын тазартып, салондағы заттарды шешіп алған соң жұмыс тоқтады. Жартылай бөлшектелген көлік 2022 жылы қазіргі иесінің қолына түскен.
Сатушылар 250 GT спорткары көп жылдан кейін жұрт көзіне түскені үшін ерекше деп санайды.
Комментариев: 0