Toyota жақында жаңа Camry шығатынын растады

Toyota-ның Америкадағы бөлімі жаңа Camry жолға шығатын күн таяп қалғанын растады. Ресми мәлімдемеден компания рестайлинг емес, жаңа буынды сөз етіп отырғанын аңғаруға болады. Жарияланған сурет те көліктің техникасына қатысты аз-кем мәлімет береді.

Фотодан машинаның артқы шамы мен жүксалғыш қақпағының бір бөлігі көрініп тұр. Ең қызығы — ақпараттық тақтайшадағы AWD және HEV жазулары. Бұдан жаңа буын өкілі гибрид күштік құрылым мен толық жетек жүйесіне ие болатынын аңғарамыз. Қазір жолда жүрген седанның Жапонияда сатылатын түріне ғана 7 ат күшін беретін (55 Нм) қосымша электромотор орнатқан. Ол жылдамдық сағатына 10 шақырымнан асқанда өшіп қалады.

Ресми мәлімдемеде Camry «жаңа биікке көтеріледі» деген сөз бар. Болжам бойынша буын ауыстырған модель Crown сияқты кроссоверге тән қасиеттерді бойына жинайды.

Жаңа Camry гибрид күштік құрылымды дәл осы Crown-нан алуы мүмкін. Мәселен, кросс-седан қазір 186 және 272 ат күшін беретін агрегаттармен жүрсе, Crown Sport-тың үш моторлы нұсқасы бар.

Toyota жаңа Camry-дің тұсаукесері 14 қараша күні Лос-Анджелес салонында өтетінін растады. Сол күні бренд жаңа буын өкілін Қытайдағы Гуанчжоу көрмесінде де таныстырады. Әртүрлі нарыққа арналған көліктерде айырмашылық болатын шығар, бірақ бәріне ортақ өзгеріс бар: Camry бұдан былай 6 цилиндрлі мотормен жүрмейді.