Toyota жаппай электрокар шығаруға қарсы

Toyota басшысы Акио Тойода автоөндірушілердің түбегейлі электрге көшуі климатқа да, автоөндіріске де оң әсер етпейді деп талай айтқан. Бұл жолы мұны Toyota-ның бас ғылыми қызметкері Джилл Пратт растады. Маман экологияға гибрид көлік көбейгені пайдалырақ деп санайды.

Пратт литий тапшылығы дәстүрлі қозғалтқыштан мүлде бас тартуды жоспарлаған өндірушілердің басты мәселесіне айналады дейді. Бұл металл қазір бәрі қолданып жатқан аккумулятордың негізгі элементі. Электрокар саны қарқынды өскенмен, планетада литий көбейіп кетпейтіні анық, оның қоры ерте ме, кеш пе, таусылады.

Ғалымның сөзінше аз ресурсты электрокар шығаруға емес, гибрид машиналарды көбейтуге жұмсаған дұрыс. Ол пікірі дұрыс екенін бірнеше қарапайым есеп арқылы көрсетті.

Мәселен: іштен жанатын қозғалтқышы бар 100 автомобиль бір шақырым жүрсе, ауаға 250 грамм зиян газ тарайды. Ал қолда бар литий сыйымдылығы 100 кВт·сағ болатын өте қымбат бір ғана электрокар жасауға жететінін ескерсек, қалған 99 машина бұрынғыдай қоршаған ортаны ластауын жалғастырады, нәтижесінде зиян газ көлемі небәрі 248.5 грамм азаяды. Егер сол 100 киловатт-сағатты 90 гибридке бөлсек, паркте дәстүрлі мотормен жүретін 10 көлік қана қалады да, зиян заттар көлемі шақырымына 205 грамм азаяды.

Toyota электрокар өндіруден мүлде бас тартып отырған жоқ. Бұған bZ4X, Lexus RZ кроссоверлері мен Қытай тұрғындарына арналған bZ3 седаны дәлел. Алайда концерн тек электромобильге басымдық бергенше, гибрид және сутекті көліктер шығарып, клиенттерге қалағанын таңдауға мүмкіндік бергенді құп көреді. Дегенмен әлемдік брендтердің көбі болашақта тек электромобиль өндіруге ниетті екенін мәлімдеді. Ал Қытай өндірушілері жарияға жар салмаса да, елден қалмай, электр қуатымен жүретін машиналарды көптеп шығарып жатыр.